《悠然日子》之〈童年揭秘〉
文：小渺
今日係國際兒童節。
手機剛好播放起《童年》呢首歌。
旋律一響起，老公即刻打開話匣子，津津樂道講起自己嘅童年往事。
燴番薯、摘果子、趕鴨追雞、落田玩耍、種蔗……
仲有好多我從未聽過、甚至想像唔到嘅趣事。
佢講得眉飛色舞，最後仲感嘆一句：
「呢啲嘢，只有農村細路先明。」
聽住聽住，連我呢個城市長大嘅人都開始羨慕。
感覺佢嘅童年，簡直就係天然遊樂場。
而我最早嘅童年記憶，竟然係保姆屋企門口嗰張小櫈仔。
保姆係一位生活富裕嘅女士，屋企經常有人打麻將。
有人行色匆匆， 有人悠閒散步， 有人愁眉深鎖， 有人滿面笑容。
我總係忍唔住幻想：
佢哋去邊？ 做緊咩工作？ 屋企發生過咩事？ 又有咩故事？
原來細個嘅我，已經對「人」特別好奇。
鍾意觀察， 鍾意分析， 鍾意了解每個人行為背後嘅原因。
而家回頭望，先發現好多事情早有跡可循。
長大後，我竟然有一種朋友們覺得好神奇嘅能力——特別認得人樣。
見過一次嘅人， 好多年後再見， 我往往仲記得。
因為父母都喺醫院工作，輪班時間唔固定。
於是，我被安放喺中山唔同嘅幼稚園讀書。
結果長大後發現，自己比人多咗好多童年同學。
最近有位中學同學由澳洲嚟溫哥華旅行。
大家聚會時傾傾下，
竟然發現原來我哋仲讀過同一間幼稚園。
真係人生何處不相逢。
至於我同妹妹嘅童年娛樂，更加簡單。
屋企張床就係舞台，
床單同蚊帳就係演出服裝。
兩姊妹唱歌、跳舞、自編自導自演，
玩足成晚都唔覺悶。
而父母放假嘅日子，
一家四口圍埋落棋；
過年過節，同醫院同事一家大細包餃子、慶祝節日。
那些熱鬧溫暖嘅畫面，
到今日依然歷歷在目。
或許正因為童年時喜歡觀察人、了解人，
多年後嘅我，
依然最喜歡聽人講故事。
只是故事嘅主角，
由街上路過嘅陌生人，
變成了一個個真實嘅生命。
長者也好， 父母也好， 夫妻也好， 青少年也好，
甚至係正處於人生十字路口、迷惘徬徨嘅人。
我都喜歡安靜坐下來，
聆聽他們的故事。
陪伴他們整理思緒， 看見自己， 尋找方向。
有人稱之為輔導， 有人稱之為陪談。
而我覺得，
不過係將童年嗰份對人嘅好奇與關心，
一直帶到今天。
原來生命好多事情都唔係偶然。
當年坐喺小櫈仔上望人來人往嘅小女孩，
從未想過，
長大後嘅自己，
竟然會走上一條心靈引導、聆聽與陪伴嘅道路。
有人話童年早已過去。
但我愈來愈覺得，
童年從來冇離開過。
它悄悄藏喺我哋嘅性格裡， 興趣裡、 選擇裡、
甚至藏喺我哋看待世界嘅方式裡。
原來，
每個人的童年，
都在默默塑造長大後的自己。
而那些當年看似平凡嘅日子，
回頭再看，
竟然都成了生命送給我們最珍貴嘅禮物。
後記
寫到呢度，我忽然明白：
老公童年學會咗勤勞與樂觀，
我童年學會咗觀察與陪伴。
一個成為了停不下來嘅「工作狂」， 一個成為了喜歡聆聽故事嘅「心靈陪伴者」。
原來，我哋今日嘅模樣，
童年早已偷偷寫下了伏筆。
